தத்துவம்

உலகத்துல உன்னை விட பெரியவன் யாரும் இல்லை அதனால நீ யாருக்கும் பயப்படாதே! அதே மாதிரி உன்னை விட சின்னவன் யாரும் இல்லை அதனால நீ யாரையும் தாழ்வா நினைக்காதே!!! அய்யம்பேட்டை அறிவுடை நம்பி கலியபெருமாள் சந்திரன்

Saturday, February 28, 2009

கொலை செய்வது எப்படி?

கொலை செய்வது எப்படி? இந்த தலைப்பில் யாராவது, எங்காவது புத்தகம் பார்த்திருக்கீர்களா? அவனும் பல இடங்களில் தேடி பார்த்துவிட்டான். கிடைக்கவில்லை. குண்டாவது எப்படி, ஒல்லியாவது எப்படி, சமைப்பது எப்படி, சாப்பிடுவது எப்படி என்ற பல எப்படிக்கள் இருந்தன. ஆனால் கொலை செய்வது எப்படி? - இல்லை. அதை பேசாமல் அவனே எழுதி வரலாற்றில் இடம் பிடிக்கலாம் என்ற முடிவுக்கும் வந்தான். அவனுடைய லட்சியத்தை அடைய சில கொலைகள் அவனுக்கு தேவையாக இருந்தது.

அவன் தந்தை ஆரம்பித்த ரைஸ் மில் அவனுக்கு நல்ல வருமானத்தை கொடுத்தது. அதனால் அவனுக்கு பணத்திற்கு குறைவில்லை. பணத்தை செலவழித்து சில நல்ல காரியங்களை செய்து அவன் லட்சியத்தை அடைய முயற்சி செய்தான். ஆனால் எதுவும் எடுபடவில்லை. இருநூறு மரக்கன்றுகளை நட்டான். அன்னதானம் நடத்தினான், ஐம்பது ஜோடிகளுக்கு திருமணம்  நடத்தினான். எல்லாம் வீண்.

அவனுடைய மில்லில் வேலை செய்யும் சண்முகத்தின் மச்சான் துரை ஒரு கட்சியில் வட்ட செயலாளராக இருப்பதாக அறிந்தான். அவனிடம் சென்றால் லட்சியம் நிறைவேறும் என்று தோன்றியது. அதனால் இவனும் அந்த கட்சியில் சேர்ந்தான். ஆனால் அவனுக்கு அரசியல் சுத்தமாக புரியாது. கட்சி நிதிக்காக இருபதாயிரம் பணம் கூட கொடுத்தான். ஒரு முறை அந்த ஊருக்கு மத்திய அமைச்சர் ஒருவர் நிதி திரட்ட வந்திருந்தார். மேடையில் வைத்து பத்தாயிரம் குடுத்தால் அவன் லட்சியம் நிறைவேறும் என்று துரை கூறினான்.

சரி, இது தான் கடைசி செலவு என்று முடிவு எடுத்து பணத்துடன் சென்றான். திடீரென்று அவன் பெயரை சொல்லி இப்பொழுது அண்ணார் பேசுவார் என்று யாரோ சொல்ல, இவனுக்கு எதுவும் புரியாமல் நின்று கொண்டிருந்தான். வெறும் பணம் கொடுத்து போட்டோ எடுத்தால் போதுமென்று நினைத்தவனுக்கு இது அதிர்ச்சியாக இருந்தது. அவனை ஏதாவது பேசிவிட்டு இருபதாயிரம் பணத்தை கொடுக்குமாறு துரை கூறி மேடைக்கு அனுப்பினான். இது அவன் ஏற்பாடு தான் என்று அவனுக்கு அப்பொழுது தான் புரிந்தது. 

இது வரை மேடையை கூட பார்க்காதவனுக்கு மேடையில் ஏறி மக்கள் முன் பேசுவது என்பது நினைத்து கூட பார்க்க முடியாததாக இருந்தது. மைக் முன் நின்றதும் அவனை அறியாமல் அவன் கால்கள் நடுங்கின. அவன் இதய துடிப்பு அவன் காதுகளுக்கு நன்றாக கேட்டது. எங்கே அது மைக் வழியாக அனைவருக்கும் கேட்டு விடுமோ என்று கூட நினைத்தான். வாய் குழறி பேச ஆரம்பித்தான். ”என் முன்னால் இருக்கும் மக்களே, என் பின்னால் இருக்கும் அமைச்சரே, எங்கோ இருக்கும் கட்சி மக்களே அனைவருக்கும் என் வணக்கம்” என அவன் சொல்லி முடிக்கும் முன் அவனை நைசா அந்த இடத்திலிருந்து நகர்த்தினார் ஒரு கரை வேட்டி பார்ட்டி. அதற்கு மேல் அவன் அந்த பக்கம் செல்லவில்லை.

அப்பொழுது தான் அவன் மனதில் அந்த விசித்திர எண்ணம் தோன்றியது. நல்லது செய்து லட்சியத்தை அடைவதை விட தவறு செய்து அடைவது எளிது என்று. என்ன தவறு செய்யலாம் என்று சிந்தித்த பொழுது, ஆசிரமம் அமைப்பது, கொள்ளை அடிப்பது, கொலை செய்வது. இது மூன்றும் அவன் மனதில் உடனே தோன்றியது. ஆசிரமம் அமைத்தால் அடுத்த இரண்டும் செய்ய எளிதாக வாய்ப்பு கிடைக்கும். ஆனால் அதற்கு வட மொழியெல்லாம் பேச கற்று கொள்ள வேண்டும். பேச்சு சாமர்த்தியம் வேண்டும். அது அவனுக்கு இல்லை என்று அவனுக்கே தெளிவாக தெரிந்திருந்தது.

கொள்ளை அடிப்பதற்கும் நிறைய பயிற்சி வேண்டும். மேலும் முதல் திருட்டிலே மாட்டி கொண்டால் எல்லா முயற்சிகளும் வீண். அதனால் கொலை தான் சிறந்த வழி என்று அவன் மனதில் தோன்றியது. அப்பொழுது தான் கொலை செய்வது எப்படி என்று ஏதாவது புத்தகம் இருக்கிறதா என்று தேட ஆரம்பித்தான். கடைசியாக அதை அவனே எழுதலாம் என்ற முடிவுக்கும் வந்தான். 

தன் முதல் கொலையை ஒரு சுப யோக சுபதினத்தில், பிரம்ம முகூர்த்த நேரத்தில் துவங்கலாம் என்று காலை நான்கு மணிக்கு எழுந்து கிளம்பினான். ஏரிக்கரை பக்கம் சைக்கிளை நிறுத்திவிட்டு தண்ணி பம்ப் பக்கம் நடந்து சென்றான். கையில் ஒரு கத்தி வைத்திருந்தான். அங்கே யாரும் இல்லை. முதலில் வருபவரை குத்திவிட்டு சென்று விட வேண்டும் என்று முடிவு செய்திருந்தான். முப்பது நிமிடமாக யாரும் அந்த பக்கம் வரவில்லை. சரி என்று வீட்டிற்கு புறப்பட்டான். அவன் போகும் வழியில் எதிரில் ஒடிசலான தேகத்துடன் வயதான ஒரு பாட்டி நடந்து வந்து கொண்டிருந்தாள். உடனே மின்னல் வேகத்தில் அந்த பாட்டியை நோக்கி சைக்கிளை விட்டான். 

அவள் அருகில் சென்றதும் கையிலிருந்த கத்தியை எடுத்து அந்த பாட்டி வயிற்றில் சொருகினான். அந்த பாட்டியின் சத்தம் ஒரு மைல் தூரத்திலிருந்த நாயிற்கு கூட கேட்கவில்லை. மூன்று முறை குத்திவிட்டு, அந்த பாட்டி அந்த இடத்தில் சரிந்து உயிர் விட்டு கொண்டிருந்ததை பார்த்ததும் அவன் கண்களில் பயம் தெரிந்தது. கத்தியை உடனே துண்டால் சுற்றி பையினுள் வைத்து வேகமாக மில்லிற்கு சென்றான். அந்த பையை அரிசி வேக வைக்கும் பாய்லரில் போட்டான். பிறகு அவன் அறையில் சென்று படுத்து கொண்டான்.

நடந்த நிகழ்ச்சி மீண்டும் அவன் கண் முன் தோன்றியது. கொலை செய்வது இவ்வளவு சுலபமா என்ற எண்ணம் வந்தது. அடுத்த முறை இளசாக யாரையாவது கொள்ளலாம் என்று முடிவு செய்திருந்தான். இன்னும் நன்றாக திட்டுமிட்டு கொன்றால் பின்னால் புத்தகம் எழுத வசதியாக இருக்கும் என்றும் நினைத்து கொண்டான். அடுத்து மில்லில் வேலை செய்யும் யாரையாவது கொள்ளலாம் என்ற எண்ணம் தோன்றியது. ஆனால் அப்படி யாராவது செத்தால் முதல் சந்தேகம் அவன் மேல் தான் வரும். அதனால் புத்தகம் எழுதுவது பாதிக்கப்படலாம் என்ற எண்ணம் ஏற்பட்டது. அதனால் சம்பந்தமில்லாதவர்களை கொலை செய்து முடித்து விட்டு பிறகு சொந்தக்காரர்களை கொலை செய்வது எப்படி என்று கற்று தரலாம் என்ற முடிவுக்கும் வந்தான். அவனுக்கு ஏதோ கொலை செய்வதில் பல வருட பயிற்சி ஏற்பட்டதை போல் தோன்றியது.

ஒரு நூற்றி தொன்னுற்றி ரெண்டு பக்க நோட்டில் தன் புத்தகத்துக்கான முதல் அத்தியாயத்தை எழுத தொடங்கினான். பிள்ளையார் சுழி போடுவதா வேண்டாமா என்ற குழம்பி, கடைசியாக பிள்ளையார் சுழியுடன் ஆரம்பித்தான். முதல் அத்தியாயம் நன்றாக வந்திருந்ததாக தோன்றியது. அந்த புத்தகத்தை யாருக்கும் தெரியாமல் பீரோ லாக்கரில் வைத்தான்.

அவன் தூங்கி எழுந்த போழுது எல்லாம் கனவா என்ற பிரமை ஏற்பட்டது. இல்லை அது நிஜம் தான் என்று உறுதிப்படுத்தி கொண்டான். வழக்கம் போல் வேலையை தொடங்கினான். மில்லில் வேலை செய்யும் குமார்தான் அவனுக்கு அந்த விஷயத்தை சொன்னான். காத்தாயி கிழவியை யாரோ திருடன் நகைக்காக கொலை செய்துவிட்டான் என்று. அது எப்படி திருடன் தான் கொலை செய்தான் என்று தெரிந்தது என் அவன் விசாரித்ததற்கு, அந்த பாட்டியின் கயிற்றிலிருந்த இரண்டு சவரன் சங்கிலியை காணவில்லை என்று அவள் மருமகள் போலிசாரிடம் சொன்னதாக சொன்னான். 

ஒரு வேளை அந்த பாட்டி இறக்கும் நேரத்தில் அந்த பக்கம் ஏதாவது ஒரு திருடன் வந்திருக்க வேண்டும். அவன் விஷயம் புரியாமல் சங்கிலியை அறுத்து சென்றிருக்க வேண்டும் என்று நினைத்து கொண்டான். முதல் கொலை இப்படி ஆகி போனதில் அவனுக்கு ஒரு வருத்தம். எங்கே அது அவன் கணக்கில் வராமல் போய் விடுமா என்று. அடுத்த வாரம் அவனுடைய இரண்டாவது கொலையை செய்ய வேண்டும் என்று நினைத்து கொண்டான். இந்த முறை தண்ணீர் பம்ப் அருகே காத்திருந்து அங்கே வரும் முதல் பெண்ணை கொல்லலாம் என்று முடிவு செய்திருந்தான். 

அந்த நாள் வந்தது. இந்த முறை நான்கு முடிந்து இருபது நிமிடமிருக்கும் பொழுது கிளம்பினான். சென்ற முறை போலவே ஏரிக்கரை அருகே நிறுத்திவிட்டு தண்ணீர் பம்பிற்கு வலது புறமிருக்கும் முள்ளு செடிகளுக்கு பின்னால் சென்று அமர்ந்து கொண்டான். வெளியே இருந்து பார்ப்பவர்களுக்கு அவன் அங்கே இருப்பது தெரியாது. அந்த பக்கம் ஒரு இருபது அடி தாண்டி போனால் பீக்காடு. அங்கே முடித்துவிட்டு ஏரிக்கு சென்று சுத்தம் செய்து கொள்வார்கள். ஆனால் தண்ணீர் பம்ப் அருகே யாரும் அப்படி செய்யமாட்டார்கள். 

ஒரு பத்து நிமிடம் அப்படியே அமைதியாக உட்கார்ந்திருந்தான். தூரத்தில் ஒரு உருவம் கையில் குடத்துடன் தெரிந்தது. இது நிச்சயம் இளசு தான் என்று அந்த உருவத்தை பார்த்ததும் தெரிந்துவிட்டது. இந்த முறை கத்தியால் குத்திவிட்டு முள் காட்டில் தூக்கி போட்டுவிட்டு செல்லலாம் என்று முடிவு செய்திருந்தான். எப்படியும் ஒரு மணி நேரத்தில் தெரிந்துவிடும். ஆனால் அதற்குள் அவன் சாட்சி எதுவுமில்லாமல் தடையங்களை அழித்துவிட்டு தூங்கி கொண்டிருப்பான். 

அந்த உருவம் அவன் அருகில் நெருங்கி வந்தது. அருகில் வந்து தண்ணிர் அடிக்க ஆரம்பித்ததும் பின்னால் சென்று வாயை பொத்தி வயிற்றில் கத்தியால் குத்திவிடலாம் என்று முடிவு செய்தான். கை ரேகையை பத்தி அவனுக்கு பெரிதாக அக்கறை இல்லை. எப்படியும் அவன் மேல் யாருக்கும் சந்தேகம் வராது என்று நம்பினான். அந்த பெண்  அருகில் வந்து குடத்தை வைத்துவிட்டு, பம்பில் நான்கு ஐந்து முறை அடித்துவிட்டு மீண்டும் முன்னால் வந்து குடத்தை கழுவியது. மீண்டும் குடத்தை வைத்து அடிக்க ஆரம்பித்தாள். 

மெதுவாக அந்த முள் மரத்தை சுற்றி கொண்டு அந்த பெண்ணின் பின்னால் செல்ல முடிவு செய்து முதல் அடியை எடுத்து வைத்தான். அவன் காலில் ஏதோ குத்தியது போல தோன்றியது. ஏதோ சரென்று அவன் மற்றொரு கால் மேல் படர்ந்து சென்றது. அவன் தன்னை மறந்து அலறினான். அவன் கையிலிருக்கும் கத்தி நழுவியது. அந்த முள் செடியை தாண்டி வந்து வெளியே விழுந்தான். அந்த பெண்அவனை நோக்கி ஓடி வந்தாள்.  அவன் நிலைமையை புரிந்த அந்த பெண் உடனே ஊருக்குள் விஷயம் சொல்லி உதவி பெற ஓடினாள். அவனுடைய கண்கள் சொருகின. ”கொலை செய்வது எப்படி?” முதல் பாகத்திலே நின்று விட்டது.

இருந்தாலும் அவன் லட்சியம் நிறைவேறியதா என்பதை தெரிந்து கொள்ள நாளை தினத்தந்தி வாங்கி பார்க்க வேண்டும். 

43 comments:

வெட்டிப்பயல் said...

முதல் முறையா வித்தியாசமான நடைல எழுத முயற்சி செஞ்சிருக்கேன்.

கதை பிடித்திருந்தால் சொல்லவும் :)

Anonymous said...

story is good. liked it.

but, what the hell is his 'latchiyam' anyway?

ச்சின்னப் பையன் said...

நல்லாத்தாங்க இருக்கு கதை....

// ”என் முன்னால் இருக்கும் மக்களே, என் பின்னால் இருக்கும் அமைச்சரே, எங்கோ இருக்கும் கட்சி மக்களே அனைவருக்கும் என் வணக்கம்” //

:-)))))))))))

பாலராஜன்கீதா said...

வெ.ப. என்றால் காதல் கதை என்ற வட்டத்திலிருந்து வெளி வந்து வித்தியாசமாக எழுதியதற்கு வாழ்த்துகள். இன்னும் பல களங்களில் எழுத வேண்டுகிறோம்.

ராசுக்குட்டி said...

கதை நன்றாகவே உள்ளது மேலும் பிடித்தும் இருக்கிறது... இருப்பினும் என்னமோ குறைகிற மாதிரி தெரியுதுங்க பாலாஜி. புதிய நடையில் இருப்பதாக இருக்கலாம்.

வெட்டிப்பயல் said...

// Anonymous said...
story is good. liked it.

but, what the hell is his 'latchiyam' anyway?

//

தினத்தந்தியில் அவன் படத்துடன், பெயரும் முதல் பக்கத்தில் கொட்டை எழுத்தில் வருவது :)

வெட்டிப்பயல் said...

// ச்சின்னப் பையன் said...
நல்லாத்தாங்க இருக்கு கதை....

// ”என் முன்னால் இருக்கும் மக்களே, என் பின்னால் இருக்கும் அமைச்சரே, எங்கோ இருக்கும் கட்சி மக்களே அனைவருக்கும் என் வணக்கம்” //

:-)))))))))))//

மிக்க நன்றி ச்சி.பை

வெட்டிப்பயல் said...

//பாலராஜன்கீதா said...
வெ.ப. என்றால் காதல் கதை என்ற வட்டத்திலிருந்து வெளி வந்து வித்தியாசமாக எழுதியதற்கு வாழ்த்துகள். இன்னும் பல களங்களில் எழுத வேண்டுகிறோம்.

6:24 PM//

அதுக்கு தான் சார் முயற்சி செய்து கொண்டிருக்கிறேன்... இன்னும் வித்தியாசமான களங்களில் எழுத நிச்சயம் முயல்கிறேன் :)

வெட்டிப்பயல் said...

//ராசுக்குட்டி said...
கதை நன்றாகவே உள்ளது மேலும் பிடித்தும் இருக்கிறது... இருப்பினும் என்னமோ குறைகிற மாதிரி தெரியுதுங்க பாலாஜி. புதிய நடையில் இருப்பதாக இருக்கலாம்.
//

இருக்கலாம்.. நீங்க வேற ஏதாவது எதிர்பார்த்திருக்கலாம்...

cheena (சீனா) said...

நான் தினத்தந்தி காசு கொடுத்து வாங்கிப் பாத்தேன் - லச்சியம் நெறெவேறிடுச்சி - பய போட்டோ வந்துடுச்சி

நல்லாருக்கு பாலாஜி - நல்வாழ்த்துகள்

வெட்டிப்பயல் said...

// cheena (சீனா) said...
நான் தினத்தந்தி காசு கொடுத்து வாங்கிப் பாத்தேன் - லச்சியம் நெறெவேறிடுச்சி - பய போட்டோ வந்துடுச்சி

நல்லாருக்கு பாலாஜி - நல்வாழ்த்துகள்

7:52 PM//

பாம்பு கடிச்சதெல்லாமா போட்டோவோட போடறானுங்க?

ஏதோ போட்டா சந்தோஷம் தான் :)

முரளிகண்ணன் said...

\\வெ.ப. என்றால் காதல் கதை என்ற வட்டத்திலிருந்து வெளி வந்து வித்தியாசமாக எழுதியதற்கு வாழ்த்துகள். இன்னும் பல களங்களில் எழுத வேண்டுகிறோம்\\

வழிமொழிகிறேன்

மாதவராஜ் said...

என்னங்க! மாறி மாறி கொலைக் கதைகளாகவே எழுதுறீங்க...
சுவாரஸ்யமாத்தான் இருக்கு.

வெட்டிப்பயல் said...

//முரளிகண்ணன் said...
\\வெ.ப. என்றால் காதல் கதை என்ற வட்டத்திலிருந்து வெளி வந்து வித்தியாசமாக எழுதியதற்கு வாழ்த்துகள். இன்னும் பல களங்களில் எழுத வேண்டுகிறோம்\\

வழிமொழிகிறேன்

//

மிக்க நன்றி முக.

நல்லா இருக்கா இல்லையானு ஒரு வார்த்தை சொல்லிருக்கலாம் :)

வெட்டிப்பயல் said...

//மாதவராஜ் said...
என்னங்க! மாறி மாறி கொலைக் கதைகளாகவே எழுதுறீங்க...
சுவாரஸ்யமாத்தான் இருக்கு.//

நன்றி தல.

அந்த கதை எழுதி 50 நாள் ஆச்சு... அடுத்து வேற களம் எடுக்கலாம் :)

குமரன் (Kumaran) said...

கொலைகாரன் இலட்சியம் என்னன்னு நீங்க சொன்ன பின்னாடி தான் புரிஞ்சது. நான் குழல்விளக்கு தான்னு தெளிவா தெரிஞ்சுக்கிட்டேன். :-)

நட்புடன் ஜமால் said...

தலைப்பே டெரெர் ...

கதை முயற்சி நல்லாவே இருந்தது ...

Indian said...

கதை நல்லாருக்கு.
அவருக்கு அஞ்சலியா?

வெட்டிப்பயல் said...

//குமரன் (Kumaran) said...
கொலைகாரன் இலட்சியம் என்னன்னு நீங்க சொன்ன பின்னாடி தான் புரிஞ்சது. நான் குழல்விளக்கு தான்னு தெளிவா தெரிஞ்சுக்கிட்டேன். :-)

//

ஆஹா... அப்படியெல்லாம் இல்லை குமரன் :)

உங்க ஏரியா வேற. அங்க நாங்க எல்லாம் நினைச்சி கூட பார்க்க முடியாது :)

வெட்டிப்பயல் said...

//நட்புடன் ஜமால் said...
தலைப்பே டெரெர் ...

கதை முயற்சி நல்லாவே இருந்தது ...//


மிக்க நன்றி ஜமால்...

தலைப்பு நம்ம வாத்தியார்கிட்ட இருந்து கத்துகிட்டது :)

வெட்டிப்பயல் said...

// Indian said...
கதை நல்லாருக்கு.
அவருக்கு அஞ்சலியா?//

மிக்க நன்றி இந்தியன்...

அதற்கான முயற்சி தான்... அவரோட மர்ம கதைகள்னு ஒரு தொகுப்பை படிச்சி வந்த இன்ஸ்பிரேஷன்ல எழுதிய கதை தான் இது. சரியா வரலைனு சொல்லலை :(

தமிழ் பிரியன் said...

interesting imagination.

வெண்பூ said...

நல்ல கதை வெட்டி.. அழகாக போர் அடிக்காம எழுதியிருக்கீங்க.. பாராட்டுகள்..

உள்ளத்தில் இருந்து.. said...

கதைக்களம் வித்தியாசமா இருக்கு ஆனா உங்க மத்த கதைகள கம்பேர் பண்ணும் போது இது ஓகே தான்.

May be we are not used to this kind of stories from you.

காதல் கதைகளுக்கு இடையில்
இந்த மாதிரியும் கொஞ்சம் sci-fi கதைகளையும் அப்ப அப்ப எழுதுங்க.

பிரேம்ஜி said...

வித்தியாசமா இருக்கு பாலாஜி. இருந்தாலும் காதல் கதைகளுக்கு மீண்டும் வந்துருங்க.. அது உங்க களம்.

தமிழன்-கறுப்பி... said...

சுவாரஸ்யமாத்தான் இருக்கு...!

வெட்டிப்பயல் said...

//தமிழ் பிரியன் said...
interesting imagination.//

மிக்க நன்றி தமிழ் பிரியன் :)

வெட்டிப்பயல் said...

// வெண்பூ said...
நல்ல கதை வெட்டி.. அழகாக போர் அடிக்காம எழுதியிருக்கீங்க.. பாராட்டுகள்..

//

மிக்க நன்றி வெண்பூ... நீங்க தான் ரொம்ப நல்ல ஃபீட் பேக் கொடுத்துருக்கீங்க :)

வெட்டிப்பயல் said...

//உள்ளத்தில் இருந்து.. said...
கதைக்களம் வித்தியாசமா இருக்கு ஆனா உங்க மத்த கதைகள கம்பேர் பண்ணும் போது இது ஓகே தான்.

May be we are not used to this kind of stories from you.
//
May be :)

//
காதல் கதைகளுக்கு இடையில்
இந்த மாதிரியும் கொஞ்சம் sci-fi கதைகளையும் அப்ப அப்ப எழுதுங்க.

//
கண்டிப்பா நண்பா. அதுக்காக தான் முயன்று கொண்டிருக்கிறேன் :)

வெட்டிப்பயல் said...

//பிரேம்ஜி said...
வித்தியாசமா இருக்கு பாலாஜி. இருந்தாலும் காதல் கதைகளுக்கு மீண்டும் வந்துருங்க.. அது உங்க களம்.//

கண்டிப்பா பிரேம்ஜி... வெறும் காதல் கதை மட்டுமே எழுதிட்டு இருந்தா எனக்கே போர் அடிக்குது... கொஞ்சம் வித்தியாசமா முயற்சி செய்யலாம்னு தான் இது...

காதல் கதைகளும் வரும் :)

வெட்டிப்பயல் said...

//தமிழன்-கறுப்பி... said...
சுவாரஸ்யமாத்தான் இருக்கு...!

12:36 PM//

மிக்க நன்றி த-க :)

வெட்டிப்பயல் said...

பி.க :)

வாழவந்தான் said...

வணக்கம் பாலாஜி,
கதை சுமார் தான், புதிய முயற்சி என்பதன் விளைவாக கூட இருக்கலாம். இல்லை சரியான பின்புலம் இல்லாததோ காரணமாக இருக்கலாம்.
உங்கள் காதல், காமடி, சயன்ஸ் பிக்ஷன் கதைகளில் இருக்கும் விஷயம் ஏதோ மிஸ்ஸிங்.
குறை சொல்லுவது சுலபம் எழுதுவது கடினம் என்றாலும் 'வெட்டிப்பயல்' கதை என்ற அளவிற்கு இதில் ஒன்றும் இல்லை.
உங்கள் முந்தய கதைகள் ஏற்படுத்தி வைத்திருந்த நம்பிக்கையே இந்த கதையை இறுதி வரை படிக்கவைத்து.

வாழவந்தான் said...

இதே விமர்சனத்தை கொஞ்சம் காமடியா சொன்னா..
'வெட்டி, உங்க கிட்ட இன்னும் நெறையா எதிர்பார்கறோம்'

மணிகண்டன் said...

வர வர உங்க அலும்பு ஜாஸ்தி ஆகி கிட்டே இருக்கு ! நல்லா இருக்குங்க கதை பாலாஜி. வித்தியாசமான முயற்சி. வித்தியாசமான நடை.ஆனாலும் கொஞ்சம் கூட தொய்வே இல்லாம கதை மூவ் ஆச்சு.

இந்த மாதிரி நடைல எழுதற மக்கள் ஒரு நேரடி முடிவு கொடுக்க மாட்டாங்க. முடிவுக்கு மட்டும் உங்க களத்துக்கு போய்டீங்க. எனக்கு பிடிச்சி இருந்தது.

வெட்டிப்பயல் said...

// வாழவந்தான் said...
வணக்கம் பாலாஜி,
கதை சுமார் தான், புதிய முயற்சி என்பதன் விளைவாக கூட இருக்கலாம். இல்லை சரியான பின்புலம் இல்லாததோ காரணமாக இருக்கலாம்.
உங்கள் காதல், காமடி, சயன்ஸ் பிக்ஷன் கதைகளில் இருக்கும் விஷயம் ஏதோ மிஸ்ஸிங்.
குறை சொல்லுவது சுலபம் எழுதுவது கடினம் என்றாலும் 'வெட்டிப்பயல்' கதை என்ற அளவிற்கு இதில் ஒன்றும் இல்லை.
உங்கள் முந்தய கதைகள் ஏற்படுத்தி வைத்திருந்த நம்பிக்கையே இந்த கதையை இறுதி வரை படிக்கவைத்து.

7:38 AM//

மிக்க நன்றி வாழவந்தான்... கண்டிப்பாக இந்த கதையில் ஏற்பட்ட வெறுமையை அடுத்த கதையில் ஈடுகட்டுகிறேன்...

வெட்டிப்பயல் said...

//வாழவந்தான் said...
இதே விமர்சனத்தை கொஞ்சம் காமடியா சொன்னா..
'வெட்டி, உங்க கிட்ட இன்னும் நெறையா எதிர்பார்கறோம்'

7:44 AM//

அடுத்த கதயோட ஒன் லைனர் கிடைச்சிடுச்சிங்க. அதை வைச்சு நல்ல கதையா கொடுக்க முயற்சி செய்கிறேன் :)

வெட்டிப்பயல் said...

//மணிகண்டன் said...
வர வர உங்க அலும்பு ஜாஸ்தி ஆகி கிட்டே இருக்கு ! நல்லா இருக்குங்க கதை பாலாஜி. வித்தியாசமான முயற்சி. வித்தியாசமான நடை.ஆனாலும் கொஞ்சம் கூட தொய்வே இல்லாம கதை மூவ் ஆச்சு.

இந்த மாதிரி நடைல எழுதற மக்கள் ஒரு நேரடி முடிவு கொடுக்க மாட்டாங்க. முடிவுக்கு மட்டும் உங்க களத்துக்கு போய்டீங்க. எனக்கு பிடிச்சி இருந்தது.//

மிக்க நன்றி மணிகண்டன்...

இது தலைவரோட மர்ம கதைகள் தொகுப்பை படிச்ச விளைவில் ஏற்பட்டது.. இதோட முதல் வெர்ஷன் போடுகிறேன்.. அதையும் பார்த்து சொல்லுங்கள் :)

கிஷோர் said...

வாழ்த்துக்கள் வெட்டிப்பயல்.

அட்டகாசமா எழுதி இருக்கீங்க. வெறும் Narration-லயே பட்டைய கிளப்பி இருக்கீங்க.

எனக்கு ஏனோ இதை படிக்கும்போது Perfume the murderer படம் நினைவுக்கு வந்தது. அந்த படம் பார்த்திருக்கீங்களா?

வெட்டிப்பயல் said...

//கிஷோர் said...
வாழ்த்துக்கள் வெட்டிப்பயல்.

அட்டகாசமா எழுதி இருக்கீங்க. வெறும் Narration-லயே பட்டைய கிளப்பி இருக்கீங்க.
//
மிக்க நன்றி கிஷோர்...

//
எனக்கு ஏனோ இதை படிக்கும்போது Perfume the murderer படம் நினைவுக்கு வந்தது. அந்த படம் பார்த்திருக்கீங்களா?//

இல்லைங்களே :(
சான்ஸ் கிடைத்தால் நிச்சயம் பார்க்கிறேன் :)

Srivats said...

Very different innovative and natural :P

vipoosh said...

உண்மையை சொன்னா நன்பா அழுதுட்டேன்....வேண்டாம்...வேண்டாம்...நமக்கெல்லாம்
ஜொல்+லி இருக்கிறத விட்டுட்டு..

Truth said...

super vetti!
romba pudichirundichu. neram iukum podum namma pakkam vandutu ponga :-)